നവാഗതനായ സാക് ഹാരിസ് തിരക്കഥയെഴുതി സംവിധാനം ചെയ്യുന്ന അദൃശ്യം സിനിമയുടെ ക്യാരക്ടർ പോസ്റ്റർ പുറത്ത്. നവംബറിൽ ആണ് ചിത്രം റിലീസ് ചെയ്യുമെന്ന് അറിയിച്ചിരിക്കുന്നത്. ചിത്രത്തിൽ എസ്.ഐ രാജകുമാർ ആയിട്ടാണ് ഷറഫുദ്ദീൻ പ്രത്യക്ഷപ്പെടുന്നത്. താരത്തിൻ്റെ ക്യാരക്ടർ പോസ്റ്ററാണ് അണിയറ പ്രവർത്തകർ പുറത്ത് വിട്ടിരിക്കുന്നത്.
മലയാളം തമിഴ് എന്നീ ഭാഷകളിൽ ഒരേസമയം ചിത്രീകരണം നടത്തിയ ബിഗ് ബജറ്റ് ചിത്രം കൂടിയാണ് അദൃശ്യം. ജോജു ജോർജ്, നരേൻ, ഷറഫുദ്ദീൻ എന്നിവരാണ് മലയാളത്തിൽ പ്രധാനവേഷത്തിൽ എത്തുന്നത്. കതിർ, നരേൻ, നാട്ടി നടരാജൻ തുടങ്ങിയവരാണ് തമിഴിൽ അണിനിരക്കുന്നത്. തമിഴിൽ യുക്കി എന്നാണ് ചിത്രത്തിന് നൽകിയിരിക്കുന്ന പേര്.
പാക്ക്യരാജ് രാമലിംഗം കഥ എഴുതിയ ചിത്രത്തിന് പുഷ്പരാജ് സന്തോഷ് ആണ് ഛായാഗ്രഹണം നിർവഹിച്ചിരിക്കുന്നത്. ഫോറൻസിക്, കള എന്നീ സൂപ്പർ ഹിറ്റ് ചിത്രങ്ങളുടെ ബാനറായ ജുവിസ് പ്രൊഡക്ഷനും യു.എ.എൻ ഫിലിം ഹൗസ്, എ.എ.എ. ആർ പ്രൊഡക്ഷൻസ് എന്നിവരും സംയുക്തമായാണ് ചിത്രം നിർമ്മിക്കുന്നത്.
കായൽ ആനന്ദി, പവിത്ര ലക്ഷ്മി, ആത്മീയ രാജൻ, പ്രതാപ് പോത്തൻ, ജോൺ വിജയ്, മുനിഷ്‌കാന്ത്, സിനിൽ സൈനുദ്ദീൻ, വിനോദിനി, അഞ്ജലി റാവു, ബിന്ദു സഞ്ജീവ്, തുടങ്ങിയവരും ചിത്രത്തിൽ പ്രധാനകഥാപാത്രങ്ങളായി എത്തുന്നുണ്ട്.
