പേരിൽ തുടങ്ങി പോസ്റ്ററുകളിൽ വരെ വ്യത്യസ്തത പുലർത്തിയ ചിത്രമാണ് റോഷാക്ക്. അതുപോലെ തന്നെ പ്രതികാരത്തിൻ്റെ ഇതുവരെ കാണാത്ത കഥയാണ് ചിത്രത്തിലും പറയുന്നത്. അവതരണ ശൈലിയും പ്രേക്ഷകർക്ക് പുത്തൻ അനുഭവമാണ് സമ്മാനിച്ചത്. കൊവിഡ് തീർത്ത പ്രതിസന്ധിയിൽ നിന്ന് അക്ഷരാർത്ഥത്തിൽ കൈപിടിച്ചുയർത്തുകയായിരുന്നു റോഷാക്ക്. ഇപ്പോഴും നിറഞ്ഞ സദസിൽ ചിത്രം പ്രദർശനം തുടരുകയാണ്.
പ്രായത്തിനെ പോലും വെല്ലുന്ന പ്രകടനമാണ് മമ്മൂട്ടി ചിത്രത്തിൽ കാഴ്ചവെച്ചത്. താരത്തിൻ്റെ അഭിനയത്തിനും നിരവധി പേർ കൈയ്യടിക്കുന്നുണ്ട്. ഇപ്പോൾ ചിത്രം റോഷാക്കിനെ പ്രശംസിച്ച് രംഗത്ത് വന്നിരിക്കുകയാണ് നടൻ വിനീത് ശ്രീനിവാസൻ. റോഷാക്ക് ക്ലാസ് സിനിമയാണെന്നും ചിത്രത്തിലെ അഭിനേതാക്കളെ ഓരോരുത്തരെയും മികച്ച രീതിയിൽ സംവിധായകൻ ഉപയോഗിച്ചിട്ടുണ്ടെന്നും വിനീത് കൂട്ടിച്ചേർത്തു.
”റോഷാക്ക് പൂർണമായും ക്ലാസ് ചിത്രമാണ്. ചിത്രത്തിലെ അഭിനേതാക്കളെ ഓരോരുത്തരെയും മികച്ച രീതിയിൽ സിനിമയിൽ ഉപയോഗിച്ചിട്ടുണ്ട്. ലൂക്, ദിലീപ്, ദിലീപിൻ്റെ അമ്മ, ശശാങ്കൻ, അനിൽ, ദിലീപിൻ്റെ ഭാര്യ, പൊലീസ് കോൺസ്റ്റബിൾ …ആരും മനസ്സിൽ നിന്നും പോകുന്നില്ല. നിസാം ബഷീറിനും ടീമിനും അഭിനന്ദനങ്ങൾ.”വിനീത് കുറിച്ചു.
