അധ്യാപക നിയമന അഴിമതിയുമായി ബന്ധപ്പെട്ട് തൃണമൂൽ കോൺഗ്രസ് എംഎൽഎ മണിക് ഭട്ടാചാര്യ അറസ്റ്റിൽ. അധ്യാപക നിയമനത്തിലെ അഴിമതിയുമായി ബന്ധപ്പെട്ട് അറസ്റ്റിലാകുന്ന രണ്ടാമത്തെ ടിഎംസി എംഎൽഎയാണ് മണിക് ഭട്ടാചാര്യ. സംസ്ഥാന പ്രൈമറി വിദ്യാഭ്യാസ ബോർഡിൻ്റെ മുൻ ചെയർമാനായ ഇദ്ദേഹത്തെ ഹൈക്കോടതി ഉത്തരവിനെ തുടർന്ന് കഴിഞ്ഞ ജൂണിൽ നീക്കിയിരുന്നു. മമത മന്ത്രിസഭയിൽ വ്യവസായ മന്ത്രിയായിരുന്ന പാർഥ ചാറ്റർജിയെ നേരത്തെ ഇ ഡി അറസ്റ്റ്‌ ചെയ്തിരുന്നു.
സി ബി ഐ അന്വേഷണം നടത്തുന്ന കേസിലെ സാമ്പത്തിക ഇടപാട് സംബന്ധിച്ചാണ് ഇ ഡി അന്വേഷണം നടത്തുന്നത്. മുൻ മന്ത്രി പരേശ് സി അധികാരി അടക്കമുള്ള 13 തൃണമൂൽ കോൺഗ്രസ് നേതാക്കളുടെ വീട്ടിൽ കഴിഞ്ഞ ദിവസം ഇ.ഡി റെയ്ഡ് നടത്തിയിരുന്നു. ഇതിന് പിന്നാലെയാണ് മണിക് ഭട്ടാചാര്യയുടെ അറസ്റ്റ്‌.
