നടി രേവതി 11 വർഷങ്ങൾക്ക് ശേഷം സംവിധാനം ചെയ്യുന്ന ‘സലാം വെങ്കി’യുടെ റിലീസ് ഡേറ്റ് പ്രഖ്യാപിച്ചു. കജോൾ നായികയായി എത്തുന്ന ചിത്രം ഡിസംബർ 9ന് തിയറ്ററുകളിലെത്തും. ജീവിതത്തിലുണ്ടാകുന്ന പ്രതിസന്ധികളെയെല്ലാം ശുഭാപ്‌തിവിശ്വാസത്തോടെ നേരിടുന്ന അമ്മ വേഷത്തിലാണ് കജോൾ എത്തുക. യഥാർത്ഥ സംഭവങ്ങളെ ആസ്പദമാക്കി ഒരുക്കിയ ചിത്രത്തിൻ്റെ റിലീസ് വിവരങ്ങൾ പുറത്തുവിട്ടത് കജോളാണ്. സമീർ അറോറയാണ് ചിത്രത്തിൻ്റെ തിരക്കഥ ഒരുക്കിയിരിക്കുന്നത്.
‘മിത്ര് മൈ ഫ്രണ്ട്’ എന്ന ഇംഗ്ലീഷ് ചിത്രമായിരുന്നു ആദ്യമായി രേവതി സംവിധാനം ചെയ്‍തത്. ദേശീയ അവാർഡും ചിത്രത്തിന് ലഭിച്ചിരുന്നു. ‘മിത്ര് മൈ ഫ്രണ്ട്’ ഇംഗ്ലീഷിലും ‘ഫിർ മിലേംഗ’ ഹിന്ദിയിലും ഫീച്ചർ സിനിമയായി സംവിധാനം ചെയ്‍ത രേവതി ‘കേരള കഫേ’ (മലയാളം), ‘മുംബൈ കട്ടിംഗ്’ (ഹിന്ദി) എന്നീ ചിത്രങ്ങളുടെയും ഭാഗമായിട്ടുണ്ട്.
