ആലപ്പുഴയില്‍ കാറില്‍ സഞ്ചരിച്ചെത്തിയ കുടുംബത്തിന് നേരെ ഭാരത് ജോഡോ ജാഥാംഗങ്ങളായ കോണ്‍ഗ്രസ് പ്രവര്‍ത്തകരുടെ ആക്രമണം. ഭാരത് ജോഡോ യാത്ര ആരംഭിക്കും മുന്‍പ് പുറക്കാട് ജംഗ്ഷന്‍ സമീപം കാറില്‍ യാത്ര ചെയ്‌തെത്തിയ കുടുംബത്തിന് നേരെയാണ് ആക്രമണമുണ്ടായത്.
ആക്രമണത്തില്‍ കാറിൻ്റെ ചില്ല് തകര്‍ന്നു. ഭാരത് ജോഡോ യാത്ര ആരംഭിക്കുന്നതിനും ഏറെ നേരത്തെ ഈ സ്ഥലത്ത് കുടുംബം എത്തിയിരുന്നു. എന്നാല്‍ പുറക്കാട് ജംങ്ഷന് സമീപം ദേശീയ പാതയില്‍ പള്ളിക്ക് മുന്‍വശത്ത് വച്ച് കാര്‍ തടഞ്ഞിട്ട് അക്രമിക്കുകയായിരുന്നു. വാഹനത്തില്‍ കുട്ടികളുമുണ്ടായിരുന്നു. വാഹനത്തിലുള്ളവര്‍ക്ക് നേരെ കോണ്‍ഗ്രസ് പ്രവര്‍ത്തകര്‍ അസഭ്യവര്‍ഷവും നടത്തി. ആക്രമണത്തിനിരയായ കുടുംബം അമ്പലപ്പുഴ പൊലീസില്‍ പരാതി നല്‍കി
