തിരുവനന്തപുരം: ബലാത്സംഗക്കേസിൽ യുഡിഎഫ്‌ എംഎൽഎ എൽദോസ്‌ കുന്നപ്പിള്ളിക്കെതിരെ ക്രൈംബ്രാഞ്ച്‌ കുറ്റപത്രം നൽകി. നെയ്യാറ്റിൻകര കോടതിയിലാണ് കുറ്റപത്രം സമർപ്പിച്ചത്. ബലാത്സംഗം, വധശ്രമം ഉൾപ്പെടെയുള്ള കുറ്റങ്ങളാണ്‌ ചുമത്തിയത്. അടിമലത്തുറയിലെ റിസോർട്ടിൽ വെച്ചാണ് ആദ്യം ബലാത്സംഗം ചെയ്തത്. 2022 ജൂലൈ 4-നായിരുന്നു ആദ്യ സംഭവം. തുടർന്ന് തൃക്കാക്കരയിലെ വീട്ടിലും കുന്നത്തുനാട്ടിലെ വീട്ടിലുംവെച്ച് ബലാത്സംഗം ചെയ്തുവെന്ന് കുറ്റപത്രത്തിൽ പറയുന്നു. എൽദോസിനെ കൂടാതെ രണ്ട്‌ സുഹൃത്തുക്കളും പ്രതികളാണ്‌.
കോവളത്തുവെച്ച് യുവതിയെ തള്ളിയിട്ട് കൊല്ലാൻ ശ്രമിച്ചു. ഇതിന്റെ പേരിലാണ് വധശ്രമക്കുറ്റം ചുമത്തിയത്. യുവതിയുമായി എം.എൽ.എയ്ക്ക് അഞ്ചുവർഷത്തെ പരിചയമുണ്ടെന്ന് കുറ്റപത്രത്തിൽ പറയുന്നു.
