നടൻ മോഹൻലാലിൻ്റെതായി ഒടുവിലെത്തിയ മോൺസ്റ്റർ എന്ന ഹിറ്റ് ചിത്രത്തിൻ്റെ ഒടിടി റിലീസ് തീയതി പ്രഖ്യാപിച്ചു. ഡിസംബർ രണ്ടിനാണ് ചിത്രം ഒടിടി പ്ലാറ്റ്‌ഫോമിൽ എത്തുന്നത്. ഡിസ്‌നി പ്ലസ് ഹോട്സ്റ്റാറിലൂടെയാണ് സ്ട്രീമിംഗ്. തിയറ്ററിൽ റിലീസ് ചെയ്ത് ഒരുമാസം പിന്നിടുമ്പോഴാണ് മോൺസ്റ്റർ ഒടിടിയിലേക്ക് എത്തുന്നത്. മലയാളത്തിലെ ആദ്യ 100 കോടി ക്ലബ്ബ് ചിത്രമായ പുലിമുരുകന് ശേഷം വൈശാഖും മോഹൻലാലും വീണ്ടും ഒന്നിച്ച ചിത്രം കൂടിയെന്ന പ്രത്യേകതയും മോൺസ്റ്ററിനുണ്ട്.
പുലിമുരുകൻ്റെ തിരക്കഥാകൃത്ത് ഉദയ്കൃഷ്ണ തന്നെയാണ് മോൺസ്റ്ററിൻ്റെയും രചന നിർവഹിച്ചിരിക്കുന്നത്. ആശിർവാദ് സിനിമാസ് നിർമ്മിച്ചിരിക്കുന്ന ചിത്രത്തിൽ, സിദ്ദിഖ്, ലക്ഷ്മി മഞ്ചു, ഹണി റോസ്, സുദേവ് നായർ, ഗണേഷ് കുമാർ, ലെന തുടങ്ങിയവർ കേന്ദ്ര കഥാപാത്രങ്ങളായി എത്തുന്നു. ലക്കി സിംഗ് എന്ന കഥാപാത്രത്തെയാണ് മോഹൻലാൽ അവതരിപ്പിച്ചത്.
ചിത്രത്തിൽ ഹണി റോസിൻ്റെ കഥാപാത്രം താരത്തിൻ്റെ സിനിമാ കരിയറിലെ ഏറ്റവും മികച്ചതായി മാറി. നിരവധി അഭിനന്ദനങ്ങളാണ് ഹണി റോസിനെ തേടിയെത്തിയത്. ‘എലോൺ’ എന്ന ചിത്രമാണ് റിലീസിനൊരുങ്ങുന്ന മോഹൻലാൽ ചിത്രങ്ങളിൽ ഒന്ന്. മലയാള സിനിമയിലെ ഹിറ്റ് കോമ്പോ ആയ മോഹൻലാൽ- ഷാജി കൈലാസ് കൂട്ടുകെട്ട് ഒന്നിക്കുന്ന ചിത്രം എന്ന പ്രത്യേകതയും ഈ ചിത്രത്തിന് ഉണ്ട്. 12 വർഷത്തെ ഇടവേളയ്ക്ക് ശേഷമാണ് ഷാജി കൈലാസ് ചിത്രത്തിൽ മോഹൻലാൽ അഭിനയിക്കുന്നത്. ഈ കൂട്ടുകെട്ട് ഒരിക്കൽ കൂടി എത്തുന്ന ആവേശത്തിലാണ് ആരാധകരും.
https://www.facebook.com/DisneyPlusHotstarMalayalam/posts/195352799711894
