ശ്രീനാഥ് ഭാസിയെ നായകനാക്കി ബിജിത്ത് ബാല സംവിധാനം ചെയ്ത ‘പടച്ചോനേ ഇങ്ങള് കാത്തോളീ’യുടെ ആദ്യത്തെ ക്യാരക്ടർ പോസ്റ്റർ പുറത്തുവിട്ടു. വിജിലേഷ് അവതരിപ്പിക്കുന്ന ‘ഗുണ്ട് സജി’ എന്ന കഥാപാത്രത്തെ പരിചയപ്പെടുത്തുന്ന പോസ്റ്ററാണ് റിലീസ് ചെയ്തത്. ഗ്രേ കളർ പാന്റും ചുവപ്പും വെള്ളയും കലർന്ന ടീഷർട്ടും ധരിച്ച് തലയിലൊരു പാത്രവും ചുമന്ന് നടന്നുവരുന്ന ഗുണ്ട സജിയെ ചിത്രത്തിൽ കാണാം.
‘ക്ലീൻ യു’ സർട്ടിഫിക്കറ്റോടെ ചിത്രം നവംബർ 24 വ്യാഴാഴ്ച തിയറ്ററുകളിലെത്തും. ടൈനി ഹാൻഡ്സ് പ്രൊഡക്ഷൻസിന്റെ ബാനറിൽ ‘വെള്ളം’, ‘അപ്പൻ’ എന്നീ സിനിമകളുടെ നിർമ്മാതാക്കളായ ജോസുകുട്ടി മഠത്തിൽ, രഞ്ജിത്ത് മണമ്പ്രക്കാട്ട് എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. പ്രദീപ് കുമാർ കാവുംന്തറയുടെതാണ് രചന.
ഇടതുപക്ഷ നേതാവായി ശ്രീനാഥ് ഭാസി പ്രത്യക്ഷപ്പെടുന്ന ചിത്രത്തിൽ ആൻ ശീതളാണ് നായിക. ഗ്രേസ് ആന്റണി, ഹരീഷ് കണാരൻ, വിജിലേഷ്, ദിനേശ് പ്രഭാകർ, നിർമ്മൽ പാലാഴി, അലൻസിയർ, മാമുക്കോയ, രഞ്ജിത്ത് മണമ്പ്രക്കാട്ട്, മൃദുല, എന്നിവരാണ് മറ്റ് താരങ്ങൾ. ഛായാഗ്രാഹണം വിഷ്ണു പ്രസാദും സംഗീതം ഷാൻ റഹ്മാനുമാണ് കൈകാര്യം ചെയ്തിരിക്കുന്നത്.
