ആലപ്പുഴയിലെ കുടിവെള്ള ക്ഷാമം നേരിടുന്ന ജനങ്ങൾക്ക് സഹായ ഹസ്തവുമായി മെഗാ സ്റ്റാർ മമ്മൂട്ടി. കുടിവെള്ളക്ഷാമം അതിരൂക്ഷമായ ഇടങ്ങളിൽ മമ്മൂട്ടിയുടെ ചാരിറ്റബിൾ ട്രസ്റ്റായ കെയർ ആൻഡ് ഷെയർ വെള്ളമെത്തിച്ചു. തൃശ്ശൂരിലെ സി.പി ട്രസ്റ്റുമായി സഹകരിച്ചാണ് ജലവിതരണം നടത്തിയത്. പ്രദേശത്ത് ജലവിതരണം മുടങ്ങിയെന്ന വാർത്ത ശ്രദ്ധയിൽപ്പെട്ടാണ് മമ്മൂട്ടി സഹായവുമായി രംഗത്ത് വന്നത്.
കഴിഞ്ഞ 12 ദിവസങ്ങളായി ആലപ്പുഴയിലെ ജനങ്ങൾ വെള്ളമില്ലാതെ വലയുകയായിരുന്നു. പ്രശ്‌നങ്ങൾ പരിഹരിച്ച് പമ്പിങ് പുനരാരംഭിക്കുന്നതുവരെ കുടിവെള്ളം വിതരണം ചെയ്യാനാണ് കെയർ ആൻഡ് ഷെയർ ലക്ഷ്യമിടുന്നത്. വാർത്ത ശ്രദ്ധയിൽപ്പെട്ട താരം സി.പി. ട്രസ്റ്റ് ചെയർമാൻ സി.പി സാലിഹിനെ വിളിച്ചുപറയുകയായിരുന്നുവെന്ന് സി.പി. ട്രസ്റ്റ് ഭാരവാഹി നിസാബ് പറയുന്നു.
സാലിഹിൻ്റെ നിർദേശം അനുസരിച്ച് ഉടൻ തന്നെ ആലപ്പുഴയിലെത്തി ടാങ്കർ ലോറികളിൽ കുടിവെള്ളം എത്തിക്കുകയായിരുന്നു. സന്നദ്ധ സേവന രംഗത്ത് നിരവധി പ്രവർത്തനങ്ങളാണ് മമ്മൂട്ടിയുടെ കോയർ ആൻഡ് ഷെയർ നടത്തിവരുന്നത്. താരത്തിൻ്റെ പ്രവൃത്തിക്ക് ആരാധകരും ആശംസകളും അഭിനന്ദനങ്ങളും അറിയിച്ചു.
