സംഗീത സംവിധായകനും ഗായകനും അഭിനേതാവുമായ ജിവി പ്രകാശ് കുമാറും ഗൗതം മേനോനും ഒന്നിക്കുന്ന ക്രൈം ത്രില്ലർ ചിത്രം 13 ൻ്റെ ടീസർ പുറത്തിറങ്ങി. ഇൻവെസ്റ്റിഗേറ്റീവ് ത്രില്ലർ വിഭാഗത്തിൽ പെടുന്ന ചിത്രം ഹൊറർ മൂടിലാണ് അവതരിപ്പിക്കുന്നത്. 1.12 മിനിറ്റ് ദൈർഘ്യമുള്ള ടീസർ പ്രേക്ഷകരിൽ കൗതുകമുണർത്തുന്നുണ്ട്. ഒരു അഭിനേതാവ് എന്ന നിലയിൽ ഗൗതം വസുദേവ് മേനോൻ സ്‌കോർ ചെയ്യാൻ സാധ്യതയുള്ള ഒരു വേഷമാണ് ചിത്രത്തിലുള്ളതെന്നാണ് ടീസർ നൽകുന്ന സൂചന.
ജിവി പ്രകാശ് കുമാർ ഒരു യുട്യൂബറെയും ഗൗതം മേനോൻ ഒരു ഡിറ്റക്റ്റീവിനെയുമാണ് ചിത്രത്തിൽ അവതരിപ്പിക്കുന്നത്. സെൽഫി എന്ന ചിത്രത്തിനു ശേഷം ജി വി പ്രകാശ് കുമാറും ഗൗതം വസുദേവ് മേനോനും അഭിനേതാക്കളായി ഒരുമിച്ചെത്തുന്നത് പ്രേക്ഷകരിൽ ആവേശം ഉണർത്തുന്നുണ്ട്. ഭവ്യ ത്രിഖ, ആദ്യ പ്രസാദ്, ഐശ്വര്യ, ആദിത്യ കതിർ എന്നിവരാണ് മറ്റ് കഥാപാത്രങ്ങളെ അവതരിപ്പിക്കുന്നത്. അൻഷു പ്രഭാകർ ഫിലിംസുമായി ചേർന്ന് മദ്രാസ് സ്റ്റുഡിയോസിൻ്റെ ബാനറിൽ എസ് നന്ദഗോപാൽ ആണ് ചിത്രം സംവിധാനം ചെയ്യുന്നത്.
സിദ്ധു കുമാർ ആണ് ചിത്രത്തിൽ സംഗീതം പകരുന്നത്. ഛായാഗ്രഹണം സി എം മൂവേന്ദർ, എഡിറ്റിംഗ് ജെ എഫ് കാസ്‌ട്രോ, പ്രൊഡക്ഷന് ഡിസൈനർ ശങ്കർ, വരികൾ മോഹൻ രാജൻ, വിഗ്‌നേഷ് രാമകൃഷ്ണ, കൊറിയോഗ്രഫി സന്തോഷ്, വസ്ത്രാലങ്കാരം ഹിന, ആക്ഷൻ കൊറിയോഗ്രഫി സ്റ്റണ്ട് രാംകുമാർ, പബ്ലിസിറ്റി ഡിസൈൻ സിപ്‌സൺ.
